Jou 18
novanm 1803, nan gwo kokenn chenn Batay gason pa kanpe nan Vètyè, rejiman lame
endijèn jeneral Jan Jak Desalin yo te mache krabinen pozisyon militè blan
franse Fò Breda ak Fò Vètyè yo nan yon atak chaje ak malè pandye ofosye
Kapwa Lamò te mennen sou yon atiyri zam ak kanon fann fwa jeneral Rochanbo te
enstale sou Bit Charye. Lame kolon franse yo te sètoblije fè bèk atè epi
kite san pèdi tan vil Okap bay lame endijèn yo. Jou ki te 4 desanm nan, lame
endijèn yo te rive libere Mòl Sen Nikola ki te dènye vil kolon franse yo te
gen anba men yo.
Jeneral
Desalin ki te vle fete deklarasyon endepandans la yon fason espesyal apre
laviktwa Vètyè a, te deside elimine non Sen Domeng kolon franse yo te bay zile
a sou sistèm kolonyal ak esklavaj peze souse a. Se konsa zile a te reprann non
Ayiti jan endyen yo te rele li a anvan kolonizasyon espayòl ak blan franse yo.
Jou
ki te 31 desanm nan, tout Jeneral yo te reyini nan Gonayiv pou tande lekti
Deklarasyon Endepandans la Jan Jak Desalin te mande mesye Bwawon Tonnè prepare.
Nan okasyon istorik sila, Bwawon Tonnè te gen manda pou li esprime bay pèp
ayisyen santiman li vizavi kolon blan franse yo.
Nan
moman sa Bwawon Tonnè deklare : « Pou m ekri Deklarasyon Endepandans
sila, fò nou ta genyen yon po kolon blan kòm papye, zo bra tèt li pou ekritwa,
san li pou lank ak yon bagèt pikèt pou plim. »
Se
konsa, jou 1e janvye 1804, yon katafal moun ak militè chaje ak
emosyon lajwa ak chalè kontantman delivrans nan kè yo te reyini sou Plas Dam,
nan Gonayiv, otou Lotèl peyi a pou fete Endepandans Ayiti. Pou okazyon sila Lotèl
peyi a, nan Gonayiv, te gen sou tèt li yon pyepalmis kòm senbòl Libète.
Desalin
ki te antoure avèk yon latriye jeneral lame bay yon diskou istorik. Lè l ap
fini diskou a li di : « Nou sèmante 7 fwa 77 fwa pou kontinye
batay jouk nou mouri pou defann Endepandans peyi a!»
Jeneral yo reponn Desalin : « Nou vle dezòmè Viv Lib ou
Mouri! »
Bwawon
Tonnè ki te kanpe kote Desalin, li
Deklarasyon Endepandans la Ofisye yo te deja siyen.
Libète
ou Lanmò
Gonayiv,
premye janvye 1804, 1e lane
endepandans
Lame
Endijèn :
Jodi a,
1e janvye 1804, Jeneral lame endijèn nan ansanm
ak lòt jeneral lame yo te konvoke pou vini pran bon jan mezi pou asire
lapè, sekirite ak Endepandans Ayiti.
Apre
Desalin, Jeneral an chèf la, ki te reyini avèk lòt jeneral yo te fin fè
konnen devan tout endijèn yo epitou alentansyon tout pisans etranje yo veritab
entansyon li pou asire, pou byennèt ak libète tout Ayisyen, yon peyi ak yon
gouvènman estab nan diskou li; apre li te fin remèsye e glorifye tout pèp la
pou san yo te vèse pou kreye nasyon sila; apre li te fin pran dizon tout moun,
Desalin mande lòt jeneral yo youn pa youn pou pwononse sèman renonsyasyon a
Lafrans, pou yo asepte mouri pito viv sou ladepandans ak dominasyon, pou yo
batay jouk dènye gout san pou defann lonè ak Endepandans Ayiti;
Apre
rekèyman ak meditasyon sou pawòl gwo prensip granmoun sot di la yo, apre yo te
fin reponn ansanm epi manifeste dezi ak detèminasyon yo pou viv lib e
endepandan, Jeneral yo sèmante devan limanite antye pou travay pou fè Ayiti
vanse vè laposperite e renonse a Lafrans ak tout lòt fòm dominasyon etranje.
Yo fini avèk nou pito mouri olye viv sou dominasyon Lafrans.
Fèt
nan Gonayiv, jou 1e janvye 1804, epi 1e Endepandans Ayiti.
Siyati :
Desalin, Jeneral an chèf;
Kristòf, Petyon, Klèvo, Jefra, Vènè, Gaba, Jeneral Divizyon yo;
P. Romen, E. Jeren, F. Kapwa, Do, J. L. Franswa, Ferou, Kanje, L. Bazlè, Maglwa Anbwaz, J.J. Èn, Tousen Brav, Yayou, Jeneral Brigad yo;
Bonè, F. Papalye, Moreli, Chevalye, Maryon, Adjidan-jeneral; Mayi, Rou, Chèf Brigad;
Chareron, B. Loret, Kenez, Makajou, Dipui, Kabòn, Dyakwa Ene, Rafayèl, Mayè, Derankou, Ofisye Lame
Epi Bwawon Tonnè, Sekretè
Tradiksyon, Prophète Joseph