Ti cheri,

Men mwen wi

Dat m pa wè w !

Dat ou pa tande m !

Se menm mwenmenm nan wi

Mwen kwè w toujou Ayiti !

Ayiti Cheri,

Yo di m ou te renmen m

Men se mwen k pa pot atansyon a sa

Kòman ou ye Toutou ?

E tout tan ou pase san w pa wè m

Pou m ta fè bèl ti karès avè w ?

Ayiti

Kòman frè m ak sè m yo ye, Manman Cheri mwen ?

Bri kouri genyen k al koupe kann Sendomeng yo pa tounen

Gen lòt reken manje nan pran kanntè pou Mayami.

Men Man, ki lè mouchwa pòch mwen

Ap sispann siye dlo nan je w ?

Ki lè tonè ap sispann boule moun anba lakay ?

Lapli tonbe, sava-n dezole

Pa vre Man ?

Tè Dayiti pa sa plen vant pitit li.

Twòp pye bwa al bwa chat

Pa gen dlo pou fè bè

Pa gen pou woze tè

Yo vle kolboso Ayiti

Yo vle grizonnen Ayiti

Men pa gen pwoblèm

Mwen renmen l konsa.

Ayiti Cheri mwen,

Ou bèl kou lakansyèl;

Ayiti bèl fanm mwen,

Mwen anvi monte w;

Lè m di w sa a pitit fi mwen,

Mwen anvi pote w sou do m

Pou vagabon pa ranse avè w;

Ayiti mwen,

Se wou ki tout mwen,

Se wou ki tout pou mwen;

Mwen gen zye sou wou.

N ap fiyanse 14 out

N ap marye premye janvye

N ap remarye chak 7 fevrye.

   Jacques Pascal

   1^e out 2002